Pælingar í skammdeginu

sumarið liðið

Wed, 05 Sep 2007 17:59:31 GMT

Jæja, þá er kominn september... Sumarið bara búið áður en það byrjaði! Það er búið að vera svo brjálað að gera í sumar að ég hef varla tekið eftir öllu þessu góða veðri sem allir eru búnir að vera að tala um...

Núna er skólinn byrjaður aftur og ég ætla að vera flink að blogga - í alvöru!! Ég lofa!

En er að bíða eftir kórstjórnarfundi og æfingu á eftir, þannig að ég er enn í vinnunni og ætti ekki að vera að eyða tíma í svona vitleysu! Og núna eru þessar 5 mínútur sem ég lofaði sjálfri mér í pásu búnar, svo ég ætla að halda áfram að vinna...

Meira seinna, en þangað til segi ég eins og Hulda vinkona - Tata!

maí...

Mon, 14 May 2007 17:53:47 GMT

Ég veit upp á mig skömmina, ég hef ekki gefið mér tíma í að blogga undanfarið... Búin að vera á fullu í vinnunni og skólanum - ekki alltaf jafn skemmtilegt, verð ég að játa! Fólk getur verið alveg ótrúlega pirrandi! En nóg um það...

Því ég er enn svo ástfangin - meira en nokkurntíman - og lífið er bara skemmtilegt :D

Við Sölvi fórum úr í byrjun maí á projektassistentkúrs á Borgundarhólmi. Við hittum allt hitt Nordjobb-fólkið og það var bæði hressandi og gaman. Það er allt á fullu og ég neeeenni ekki að pæla í vinnunni þegar ég er ekki að vinna - en geri það svo samt, til ama fyrir alla mína nánustu, sem eru brááááðum komin með mikið meira en nóg af Nordjobb :P

Svo fórum við Svavar í bústað um helgina. Þetta var bústaðurin hennar Gyðu og mættir voru (auk Gýðu, Svavars og yours truly) Hafdís og Óli og Hulda og Theó. Þetta var bara gaman, fyrst fylgst með Júróvisjón og síðan kosningarvökunni langt fram eftir nóttu...

Hvað er annars nýtt? Jú! Hún Ynja er orðin útiköttur, eða svona næstum því... Hún fékk nýja fína ól, fjólubláa með bjöllu og öllu, og svo fær hún að hoppa ein útum eldhúsgluggann og dúlla sér í garðinum og móunum. Erkióvinurinn, læðan í næsta húsi, er eiginlega alveg hætt að voga sér inn í garðin og mín er nokkuð sátt með sjálfa sig :P

Apríl að verða búinn!

Sun, 22 Apr 2007 15:11:08 GMT

Ótrúlega hefur þessi mánuður liðið hratt! Ég næ varla að fylgjast með! Í fyrra fannst mér ég fara að sofa á föstudegi, vakna á mánudegi, fara að sofa á mánudegi og vakna á föstudegi - svo hratt leið tíminn. Núna er þetta orðið en verra. Ég fer að sofa 1. hvers mánaðar, vakna um miðjan mánuðinn og veit svo ekki af mér fyrr en mánuðirinn er að verða búinn!

Annars er lífið bara yyyyyndislegt! Vorið er yndislegur tími og mér er alveg sama þótt rigni :P Það fraus saman núna aðfaranótt sumardagsins fyrsta, þessvegna er ég bjartsýn um að þetta verði frábært sumar!

Vorið er svo skemmtilegur tími - vorblóm og bjartar nætur, tréin að springa út og ástin í loftinu. Allt fyllist af bjartsýni! Skítt með að stressið er að sliga mann, enda önnin að vera búin og ég er komin með aðstoðarmann í vinnunni. Þetta getur því bara skánað héðan af ;)

Og afhverju stafar svo þessi bjartsýni mín? Ætli það sé ekki bara af því að lífið er skemmtilegt!

eitthvað sniðugt

Wed, 14 Mar 2007 18:30:14 GMT

Jæja, ætli ég verði ekki að flýta mér að koma með nýja færslu, svona til að halda þetta marsheit mitt...

Ég var að koma af ráðstefnu um rafræna skráningu og miðlun á söfnum, á vegum safnaráðs. Þetta var mjög fróðlegt. Mér fannst samt fyndið hvað ég er farin að þekkja marga í þessum bransa. Loksins er ég farin að vera eitthvað annað í fræðunum en bara dóttir hennar móður minnar, og þá er ég passlega hætt í safnabransanum - í bili... Mig langar soldið að halda áfram í þessum geira, þetta er skemmtilegur business. En ætli framtíðin ein muni ekki leiða í ljós hvar ég enda!

Og svo var ég dugleg að koma Nordjobb-vinnubæklingunum út til safnamanna - vonandi tekst mér að fá einhver Nordjobb í safnageiranum út á þetta...

Laugardagur

Sat, 10 Mar 2007 21:48:32 GMT

Ég er sorgleg manneskja. Er að leka niður úr þreytu og raunar komin upp í rúm á laugardegi fyrir kl. 10... Bara engan sem langar að gera neitt skemmtilegt í kvöld (enda held ég að ég hafi bara gott af því að hvíla mig :P)

Jói bróðir er komin á fast. Það er samt allt í lagi, því stúlkan er svo yndæl :P Samt finnst mér þetta fyndið. Hann var síðast á föstu áður en við Theó byrjuðum saman, þannig að okkur er greinilega ekki ætlað að vera bæði á föstu á sama tíma...

Ég var á árshátíð sagnfræðinema í gær. Það var bara mjög gaman. En voðalega finnst mér ég samt vera orðin gömul...

Ég hef ekkert af viti að segja, hugsa að ég láti bara hér við sitja :)

300...

Wed, 07 Mar 2007 23:44:52 GMT

Var að koma af forsýningu á 300 og ég get bara sagt eitt - vá! Ekta bíómynd, sem þarf að sjá í bíó, en ég vil ekki segja meir...

Ég veit að það hljómar furðulega, en já, ég á það til að vaska upp og það er svosem sjón að sjá! Í gær tókst mér t.d. að sprauta sápuvatni í augað á sjálfri mér, en eins og margir vita er undirrituð með ilmefnaofnæmi og þið getið rétt svo ímyndað ykkur útlitið á mér þegar ég fór í rúmið í gær, með annað augað eeeeldrautt og bólgið... Ekki skrítið að mér sé meinilla við þessa iðju!

smá pæling...

Tue, 06 Mar 2007 20:48:15 GMT

Hver fann eiginlega upp á því að tefalhúða pönnur? Þetta er snilld! (já, ég var að vaska upp...) Ég veit að ég get flett þessu upp, en mig langaði samt að spyrja að þessu hérna, ekki svo mikið til að lýsa yfir fáfræði minni um sögu teflonsins, heldur frekar til að lýsa yfir aðdáun á þessu frábæra efni, sem gerir að verkum að maturinn brennur ekki við og ekkert mál er að þrífa pönnuna á eftir...

Eitt enn: Hvað segir það eiginlega um eldhúshnífasafn mitt, að besti hnífurinn sem ég á, er úr Tiger og kostaði 400 Isk?? Ég kýs að túlka það á þann veg, að hnífarnir úr Tiger séu mun betri en búast mætti við!

Og sko hvað ég er dugleg að taka sjálfa mig á orðinu! Bara strax búin að blogga aftur!

ok ok, ég skal verða duglegri...

Tue, 06 Mar 2007 20:16:10 GMT

Jæja, ég strengdi engin nýársheit, en núna skal ég strengja mars-heit: ég skal verða duglegri að blogga.

Ég var á Vestfjörðum um daginn með skólanum. Það var frábært og ég mæli eindregið með því að fólk kíki þangað. Ef þið viljið fleiri dirty details um þá ferð verðið þið bara að hafa samband við mig, ég fer nú ekki að blogga um slíkt :P Ekki að það hafi gerst neitt merkilegt, ég er bara að reyna að láta líf mitt hljóma meira spennandi en að er í raun...

Það er fáránlega erfitt að blogga með malandi kött í fanginu!!

Annar gengur lífið bara sinn vanagang, skóli og vinna og heimalærdómur og vinir...

Ég er búin að ákveða lokaverkefni í hagnýtu, á að vísu eftir að fá það samþykkt og fjármagnað og allt slíkt - en ég skal! Ég mun öruglega skrifa meira um það seinna...

Og svo er komið vor! Ekki nóg með að það er farið að vera bjart þegar maður fer á fætur á morgnanna, og marsmánuður er víst vormánuður samkvæmt dagatalinu, heldur sá ég "vintergæk" áðan þegar ég var að labba úr vinnunni í strætó! Ég hef ekki grænan, hvað þetta blóm heitir á íslensku, en það er allavega mikill vorboði í mínum huga... Og svo tengi ég það líka við páskaegg :D

Jæja elskurnar mínar, verið nú duglegar að kommenta og reka á eftir mér (ég skal reyna að fá meira í yfirlit næsta árs en "ég var að vinna - bloggaði einusinni!" ) ")...

2006 in memoram...

Tue, 06 Feb 2007 23:24:51 GMT

Ég er búin að sjá það á ótal bloggsíðum vinkvenna undanfarið (já, merkilegt nokk eru það aðalega vinKONUR sem blogga, ekki mikið um að strákarnir geri það, allavega ekki strákarnir mínir) að það er víst til siðs að gera síðasta ár upp svona í upphafi nýja ársins... Ætli ég geri ekki það eina sem svona hópsál eins og ég get gert og fylgi því eftir...

En frá hverju á að segja? Árið 2006 er liðið, í aldanna skaut og aaaaaldrei það keeeemur tilbaaaaka, eins og einhver sagði...

Látum okkur nú sjá hvort ég muni eftir einhverju, og hvort það sé þá merkilegt líka...
(ég á eftir að gleyma helling, ekki taka því persónulega!)
Gerum þetta skipulega, ég ætla að taka mánuð fyrir mánuð...

Janúar: Dísus, það er svo langt síðan, ég man ekkert hvað gerðist þá! Jú, það var víst áramótapartí í Holtsgötunni, þá var Theó búinn að vera þar í tæpan mánuð. Ynju fannst flugeldarnir æði.

Febrúar: Ég byrjaði að íhuga hvort ekki væri tími til kominn að fara að íhuga að jafnvel fara að byrja kanski að hugsa um að fara að fara að byrja að pæla í ritgerðasmíð...

Mars: Hvað gerðist í mars?? Man ekki, öruglega bara ritgerðarsmíð og undirbúningur að sýningunni. Svo vorum við líka farin að plana sumarstarfið uppi á safni og ráða leiðsögumenn, ef ég man rétt...

Apríl: Jói bróðir varð tvítugur. Ég byrjaði að blogga.

Maí: Ég skilaði annarri BA ritgerðinni, 9.000 orð um upphaf danska minnihlutans í Suðurslésvík - á þýsku! Jafnframt vorum við á fullu í að setja upp diskó/pönk og gera safnið klárt fyrir sumaropnun. Landnámssýningin í Aðalstræti opnaði.

Júní: Ég ákvað að fresta skilum sagnfræðiritgerðinnar þangað til í september. Safnið opnaði. Sýningin “mín” opnaði. Grillboð. Það ringdi.

Júlí: Sumarstarf, vinna, rigning. Man ekki eftir öðru. Það var planið mitt þetta sumar að njóta þess að vera léttklædd í vinnunni á góðviðrisdögum, enda var þetta fyrsta sumarið þar sem ég var ekki í síðu ullar- eða klæðispilsi alla daga... En hvað varð um sólina?

Ágúst: Rigning. Allir voru að vinna um verslunarmannahelgina. Útihátíð í Grafarvoginum. Grill og risatjald. Við Theó hættum saman.

September: Ferðalög. Fyrst til Alta með mömmu á heimsminjaráðstefnu. Síðan sóttum við útisöfnin heim, bæði Maihaugen og Norsk Folkemuseum. Síðan fór mamma heim, en ég varð eftir og beið eftir hinum úr Nordklúbbnum. ”Heja Norge” heppnaðist bara vel og mér skilst að það hafi tekist að koma noskri ungmennahreyfingu af stað. Húrra! :D Svo kom ég heim og vakti í tvo sólahringa að horfa á lélegar bíómyndir með Þóri... Steig síðan upp í vél til Skt. Pétursborgar með Árbæjarsafnsliðinu. Frábær ferð. Ballet og Vetrahöllin og einkasafn Péturs mikla...

Október: Afmæli. Útskrift. Kennsla. Stofnuðum kórinn.

Nóvember: Það var gaman að kenna í FG. Mér fannst það fróðlegt. Ég fékk kennslumatið um daginn og kem bara nokkuð vel út, þótt ég segi sjálf frá. Svo virðist sem flestum krakkanna finnist ég eiga heima í kennslu :D

Desember: Hvað varð um desember? Ég veit að ég var að kenna, ég var að vinna á Árbæjarsafni, ég var að vinna á Landnámssýningunni, það voru jól, við stússuðumst í að tæma Holtsgötuna, kórinn söng á fullt, fullt af tónleikum og eitthvað fleira gerðist líka. Samt finnst mér þessi mánuður bara hafa horfið og lítið sem ekkert gerst! Jólin fóru eiginlega bara framhjá mér, voru bara búin áður en þau voru byrjuð, en svona er lífið víst stundum J

Þetta var stutt yfirlit yfir árið 2006. Þegar ég les þetta svona í gegn eftirá, þá sé ég að það gerðist bara heilmikið...

Ætli 2007 verði líka svona viðburðaríkt? Svo virðist vera, allavega er ný íbúð, ný vinna og nýtt nám komið á listann. Og febrúar er rétt að byrja! Það verður gaman að sjá hvernig lífið er að ári...

Allavega, ætli þetta sé ekki nóg í bili?? Segjum það :P

Hvað er að gerast?

Tue, 06 Feb 2007 23:23:43 GMT

8| Hvað er að gerast?? Komnir rúmlega 2000 gestir! Ma'r bara orðinn vinsæll allt í einu 8)

Það myndi nú gleðja mig ef ég fengi komment eða fólk kvittaði í gestabókina... ;)

Kominn tími fyrir nýja færslu?

Sun, 14 Jan 2007 20:18:38 GMT

Jú, ætli það sé ekki kominn tími á nýja færslu... Mikið búið að vera að gerast undanfarið!

Gleðilegt nýtt ár! Kanski ágætt að byrja á því ;)

Annars legst nýja árið alveg hreint mjöög vel í mig. Ég er flutt núna, við Jói erum á fullu að innrétta nýju íbúðina (með mikilli aðstoð foreldranna), en þetta er enn helst til frumstætt hjá okkur... Í dag vorum við að færa skápa. Núna getum við farið að versla í matinn og sett hann í ísskápinn! Við erum búin að tengja hann :D Þetta er allt að koma...

Svo er ég byrjuð að vinna hjá Norræna félaginu. Nýja vinnan leggst vel í mig, ég hlakka til að starfa við þetta. Ég held að ég sé að ná tökum á þessu, en það er gott að vita að ég get leitað til Ölmu, Virpi og Katrínar eftir aðstoð ef á þarf...

Skólinn byrjar byrjar á þriðjudaginn kemur og ég hlakka mikið til...

Og svo er það nýjasta fréttin: Ég er komin með fartölvu! Ég gerðist fullorðin, skrifaði undir minn fyrsta víxil og á núna þessa líka yndælu vél, sem ég er að skrifa á... Gaman :D

Annars er ég eitthvað voðalega andlaus í augnablikinu, veit ekkert hvað ég á að skrifa, þannig ætli ég láti þetta ekki bara gott heita í bili :)

Óviðbjargandi, gamli nördinn ég...

Fri, 22 Dec 2006 16:28:22 GMT

Komst að því í gær að ég er orðin gömul... Fór á jólaball stúdenta, sem er svosem ekki frásögu færandi, þar var mikið fjör og spilaði Sálin hans Jóns míns fyrir dansi. Gyða og Hulda kíktu með mér, auk Theó og Áka bróður hans, sem er á landinu eins og er. Annars hitti ég ekki marga sem ég kannaðist við, en vil þó segja frá tveim hér...

Fyrst var ég að rölta um svæðið, þá allt í einu hoppar stúlka í fangið á mér og knúúúúsar mig af öllu afli "hæææææ Heeeelgaaa!" og ég geri eins og maður gerir, knúsa á móti og heilsa. Var samt engu nær hver stúlkan var. Síðan snýr hún sér að vinum sínum og kynnir mig: "Þetta er Helga, þýskukennarinn minn!" Þá var þetta einn af nemendunum úr FG og ég veit núna hvað hún heitir (og að hún fékk 10 á munnlega prófinu hjá mér :P)... Ég fer aldrei á djammið aftur! Hugsa sér að rekast á gamla nemendur sína þar :S

Svo var það hinn kunninginn... Ég fór á barinn að panta mér gin&tonic og hvað haldiði ekki að annar barþjóninn hafi blikkað mig! Ég horfði skilningsvana á móti, því það var verið að afgreiða mig og ég gat ekki hugsað mér hvað maðurinn vildi eiginlega. Þá spyr hann "hva' þekkirðu mig ekki? Og það eftir öll þessi ár í Shadowblades!!" Hvernig á maður líka að þekkja fólk sem er með manni í guildi í on-line tölvuleik?? Er það furða að ég hváði! Ég bara spyr...

Me be one lucky bastard...

Tue, 19 Dec 2006 11:50:12 GMT

Það er alveg ótrúlegt hvað lífið smellur saman hjá mér... Ég var ekki fyrr búin að ljúka námi en ég gat byrjað í nýrri, spennandi og gefandi vinnu, en eins og glöggir muna þá útskrifaðist ég úr HÍ þann 21. október og tók að kenna strax þann 23. Svo þegar því öllu var lokið fór ég aftur upp á safn að taka leiðsagnir, sem er gaman en samt orðið frekar þreytt eftir öll þessi ár.
Eftir fyrsta daginn þar, í strætó á leiðinni heim, fór ég að hugsa með mér "hmm... Ég er bara að vinna á safninu fram að áramótum. Hvað á ég svo að gera? Ég þarf einhverja vinnu með þessum einingum sem ég er að taka í masternum í vor..." Ég kom heim, þungt hugsi, og settist við tölvuna til að skoða tölvupóstinn... Haldiði ekki að þar hafi beðið mín póstur frá Norræna félaginu, sem sendur hafði verið út á þeirra póstlista. Þetta var auglýsing og var auglýst staða, sem mér þótti mjög áhugaverð. Ég sótti því um, en umsóknarfresturinn rann út á föstudaginn var. Síðan hringdu þeir í mig í gær, í heldur óformlegt símaviðtal, en ég hlýt að hafa komið vel fyrir, því rétt í þessu hringdu þeir í mig aftur og ég fékk starfið! Byrja að vinna þar 5. jan! Gamangaman :D

Og Alma mín, ef þú lest einhverntíman bloggið mitt, þá vil ég bara segja að ég er ótrúlega glöð að hafa fengið þetta. Ég hlakka mikið til að byrja, en ég er líka fegin að þú verður þarna fyrstu tvo dagana til að setja mig af stað :P

Þúsundasti gesturinn!

Thu, 23 Nov 2006 12:46:37 GMT

Nei, vá, var að taka eftir því núna að ég hef fengið rúmlega 1000 gesti inn á síðuna síðan ég byrjaði! Frábært :D

Verst þykir mér, að ég á öruglega helminginn af færslunum sjálf, því ég er alltaf að tékka hvort einhver hafi skrifað í gestabókina eða kommentað á færslu - svona er maður athyglissjúkur ;)

Annars er lítið að segja... Vinna, vinna, vinna o.s.frv. En nú fer að styttast í að önnin klárist, dimision á morgun og svo kennsla fram á fimmstudag :)

hrakfallabálkurinn ég...

Mon, 13 Nov 2006 11:16:25 GMT

Þá veit ég það... Hvítvín, hálka og háir hælar fara ekki vel saman!

Við Hulda fórum í vísindaferð til Vífilfells á föstudaginn var, áhugaverður rúntur, gamlar auglýsingar og þetta líka fína hvítvín í boði... Hvorug okkar hafði borðað mikið yfir daginn - og fróðir menn vita hvernig slíkt endar! Það vildi ekki betur til en svo, að á leiðinni út þá steig ég eitthvað vitlaust, tókst á loft og lennti beint á bakinu (Hulda heldur því fram að ég hafi legið lárétt í loftinu áður en ég hlammaðist niður). Þá fyrst fór áfengið að virka, þegar adrenalínið spýttist af stað og varð undirrituð frekar skrautleg - og það klukkan 7 á föstudagskvöldi!

Við fengum elskuna hann Óla til að sækja okkur og fórum heim, en þar var húsið fullt af fólki, Ingunn og Baldur í heimsókn hjá Theó og ég sem ætlaði að vera svo félagslynd var búin á því rétt um 11 og komin í rúmið...

Vaknaði á laugardag með kúlu og smá hausverk, en fannst það bara vel sloppið, svona miðað við allt. Fór með leiðsögn um Kvosina, því Nordklúbburinn fékk heimsókn hóps krakka frá Danmörku og þau þurftu náttla að kynnast Reykjavík. Við fórum síðan upp á safn og tók Jói leiðsögn þar.

Svo ætluðum við Hafdís, Hulda og Þórdís sko svo sannarlega að skemmta okkur um kvöldið, enduðum heima með hvítvín (að vanda :P), stelputónlist og hárspennur að skemmta okkur og raid'uðum barskápinn þegar líða fór á kvöldið, en auk þess hafði búkonan Hulda tekið með sér tequilaflösku... Þórir og Óli kíktu við og eins einhverjir vinir Huldu. Mikið fjör og mikið gaman, en eitthvað varð þetta skrautlegt þegar líða tók á nóttina...

Svo ætluðum við bara að hafa það gott í gær, en þá kom eftirkastið eftir hið mikla fall föstudagsins - bakið gaf sig. Á skrifandi stundu er ég eins og gamalmenni, get varla gengið upprétt og allt gerist voða hægt. Ég er gangandi dæmi um það, af hverju nemendur mínir ættu ekki að drekka...

En annars var gærdagurinn kósí, við horfðum á Amelié, Goodbye Lenin og 7 Zwerge, allt góðar myndir og engin þeirra amerísk! Yndislegur leti-sunnudagur, þrátt fyrir bakverki... En eins og mamma myndi segja - þetta grær áður en ég gifti mig!

Nóg um það, gatið er að verða búið hjá mér, gríslingarnir bíða. Við heyrumst!